Teambuildingtur til Trond Mohn Games
Friidrettsgruppa fylte onsdag Triobussen med ungdomane i dei to eldste treningsgruppene våre (11-15 år), samt nokre vaksne og la i veg til Bergen og Fana stadion for å sjå på Trond Mohn Games. Eit stort internasjonalt stemne med både sterke norske og utanlandske trekkplaster.
Med full buss frå Triohuset før kl 15 styrte sjåfør Tor Harald oss sikkert i veg til bydn. Ein stopp på Pizzabakaren på Os gjorde godt og vi var framme akkurat i tide til hovuddelen av stemnet. Vi fekk sjå mange gode løpsprestasjonar, med Karsten Warholm sitt verdsrekordforsøk som største høgdepunktet. Og verdas beste sleggekastar, samt spanande konkurransar i lengde, tresteg, kule og stav. Med Warholm’en i mål, måtte vi springe i bussen for å vende nasen heimover så vi rakk ferga.
Der vart seint i seng for både unge og gamle, men målet for alle var å kjempe seg gjennom ein hard skule-/arbeidsdag likevel. Ein triveleg tur var det i allefall, og med så kjekke og veloppdragne ungdomar er det ikkje noko problem. Takk til alle som bidrog så vi fekk dette til :)
